gipuzkoakultura.net
Untzi Museoa - Museo Naval. Kaiko pasealekua, 24. 20003 Donostia (Gipuzkoa).
Tel.: +34 943 430051. Fax.: +34 943 431115.
E-mail: mnaval@gipuzkoa.net
Erreportaia
DONOSTIAKO ARRANTZA GAUR EGUN, ETORKIZUNERA BEGIRA
70eko urteetako krisialdiaren ondotik jarraitutako politikaren eta Europako Komunitatean sartu izanaren ondorioz, Donostiako baxurako flota, oro har euskal flotak bezala, oso murrizketa latza jasan zuen. Inguraketa-arrantzan eta beita bizikoan ari ziren arrantza-ontziak, neurri handienekoak alegia, 20tik 4ra jaitsi dira, laurogeiko azken urteetatik gaur egun arte. Aitzitik, aparailu txikiagoekin aritzen direnak, epe berean, 4tik 18ra igo dira.
Donostiako baxurako flota txikiaren jarduera kostaldetik hurbileko kaletan biltzen da nagusiki, eta atunak, berdela, txitxarroa, antxoa eta sardina izaten dituzte jomugan. Sarrera handienak ematen dituen espeziea hegaluzea da. Gainera, aparailu txikiekin aritzen den flota balio handiko espezieen arrantzan aritzen da, eta errentagarritasun handiagoa lortzen du.
Donostiako arrantza jarduerak, azken hamarkada hauetan zehar, jaitsiera kezkagarria izan du. Ezinbestekoak dira analisi kritiko bat eta etorkizuna ziurtatzera begira hainbat neurri aplikatzea.
Arrantza jarduerak hiriaren bilbe ekonomikoan duen balioa neurtzean gutxietsi egiten da, ez delako kontuan hartzen hiriak turismoa erakartzeko duen indarrean betetzen duen eginkizuna. Eta garrantzi ekonomikoa eta turismoaren gaineko eragina alde batera utzirik ere, ez dugu ahantzi behar arrantza portua, Donostiaren sorburuaren lekukotasun bizia izanik, lehen mailako kultur eta nortasun erreferente bat dela.
